Cyfrifiannell y Cynllun Cadw Swyddi yn sgil Coronafeirws
Yr hyn y gallwch ei hawlio
Mae’r Cynllun Cadw Swyddi yn sgil Coronafeirws wedi’i ymestyn tan 30 Medi 2021. Ar gyfer cyfnodau hawlio rhwng 1 Tachwedd 2020 a 30 Ebrill 2021, gallwch hawlio 80% o gyflog arferol cyflogai ar gyfer oriau na chawsant eu gweithio, hyd at uchafswm o £2,500 y mis.
O 1 Gorffennaf 2021 ymlaen, mae’r swm y gallwch ei hawlio’n newid:
| Mis yr hawliad | Cyfraniad y llywodraeth: cyflog am oriau na chawsant eu gweithio | Cyfraniad y cyflogwr: cyflog am oriau na chawsant eu gweithio |
|---|---|---|
| Mai | 80% hyd at £2,500 | 0% |
| Mehefin | 80% hyd at £2,500 | 0% |
| Gorffennaf | 70% hyd at £2,187.50 | 10% hyd at £312.50 |
| Awst | 60% hyd at £1,875 | 20% hyd at £625 |
| Medi | 60% hyd at £1,875 | 20% hyd at £625 |
Er mwyn bod yn gymwys ar gyfer y grant, mae’n rhaid i chi dalu o leiaf 80% o’u cyflog i’ch cyflogeion am y cyfnod y maent ar ffyrlo. Gallwch ddewis talu mwy na hyn iddynt, ond nid oes rhaid i chi wneud hynny.
Ni allwch hawlio cyfraniadau Yswiriant Gwladol na chyfraniadau pensiwn y cyflogwr, ond mae’n rhaid i’r cyflogwr dalu’r rhain o hyd.
Ynglŷn â’r gyfrifiannell
Defnyddiwch y gyfrifiannell hon i gyfrifo’r ffigurau y bydd eu hangen arnoch pan fyddwch yn hawlio drwy’r Cynllun Cadw Swyddi yn sgil Coronafeirws.
Bydd yn rhaid i chi ddefnyddio’r gyfrifiannell ar gyfer pob cyflogai sydd ar ffyrlo llawn neu ffyrlo hyblyg, ac adio canlyniadau swm pob hawliad ar gyfer y cyfnod hawlio. Ar gyfer eich cofnodion, bydd y gyfrifiannell hefyd yn dadansoddi’r cyfrifiadau ar gyfer pob cyfnod cyflog.
Gallwch ddefnyddio’r gyfrifiannell hon ar gyfer y canlynol:
- cyflogeion sydd ar ffyrlo llawn ac felly sydd heb weithio unrhyw oriau
- cyflogeion a ddaeth yn ôl i’r gwaith am rai o’u horiau arferol o 1 Gorffennaf 2020 ymlaen
- y mwyafrif o gyflogeion sy’n cael eu talu’n wythnosol, bob pythefnos, bob pedair wythnos neu’n fisol mewn cyfnodau cyflog sefydlog
- cyflogeion sydd wedi dychwelyd o absenoldeb statudol o 1 Awst 2020 ymlaen, er enghraifft, absenoldeb mamolaeth
Ni ellir defnyddio’r gyfrifiannell ar gyfer cyflogeion os yw’r canlynol yn wir:
- gwnaethant ddechrau cyfnod rhybudd neu roedd yn ofynnol iddynt ddychwelyd i’r gwaith yn ystod cyfnod rhybudd i weithio yn yr un cyfnod hawlio, ar neu ar ôl 1 Rhagfyr 2020
- mae ganddynt gyfnod cyflog blynyddol
- maent wedi’u trosglwyddo o dan reoliadau Trosglwyddo Ymgymeriadau Diogelu Cyflogaeth (TUPE)
- ni chawsant eu cyflogi’n barhaus cyn i’w ffyrlo
- maent wedi dychwelyd o absenoldeb megis absenoldeb mamolaeth yn ystod y 3 mis diwethaf (os yw’r cyfnod hawlio ym mis Gorffennaf 2020 neu’n gynt)
- maent yn cael cyfraniadau pensiwn y cyflogwr y tu allan i gynllun pensiwn cofrestru awtomatig
- daeth eu ffyrlo i ben ac yna dechreuodd eu ffyrlo eto yn ystod yr un cyfnod hawlio
- cawsant eu talu ar ffurf amrywiol ac maent wedi bod ar fwy nag un cyfnod o ffyrlo lle’r oedd unrhyw ran o’r cyfnodau ffyrlo yn ystod blwyddyn dreth 2019/20
- mae ganddynt gyflog amrywiol, gwnaethant ddechrau gweithio cyn 6 Ebrill 2020 ac nid oeddent ar gyflogres eu cyflogwr ar neu cyn 19 Mawrth 2020
- gwnaethant ddechrau gweithio i’w cyflogwr yn ystod cyfnod calendr ym mlwyddyn dreth 2019-20 sy’n cydfynd â’r holl gyfnod neu ran ohono
- maent ar gyflog sefydlog ac wedi newid amlder y taliadau, er enghraifft o gyflog misol i gyflog wythnosol
Yn yr achosion hyn, mae’n rhaid i chi gyfrifo’r hyn y gallwch ei hawlio â llaw gan ddefnyddio’r arweiniad cyfrifo neu ceisiwch gyngor proffesiynol.
Eich cyfrifoldeb chi yw gwneud yn siŵr bod y swm rydych yn ei hawlio yn gywir.
Cyn i chi ddechrau
Bydd angen y canlynol arnoch:
- dyddiad dechrau’r cyfnod hawlio (ar gyfer eich hawliad cyntaf, dyma pryd y dechreuodd y cyflogai cyntaf ei gyfnod ffyrlo)
- dyddiad gorffen y cyfnod hawlio
- dyddiadau talu cyflog (pan fydd y cyflogai’n cael ei gyflog)
- dyddiadau cyfnodau cyflog (y cyfnodau sy’n cael eu cwmpasu gan y cyflog)
- symiau taliadau rheolaidd
- taliadau ychwanegol (megis cildyrnau, bonysau dewisol, taliadau nad ydynt yn arian parod)
- dyddiad y daeth y ffyrlo i ben, os nad yw’n parhau
O 1 Gorffennaf 2020 ymlaen, os yw’r cyflogai ar ffyrlo hyblyg, bydd hefyd angen y canlynol arnoch:
- oriau arferol y cyflogai
- yr oriau gwirioneddol a weithiwyd
- yr oriau ar ffyrlo
Darllenwch ragor am y camau i’w cymryd cyn cyfrifo’ch hawliad
Dechrau nawr